豬年豬一般的生活 - 食同訓

恭喜發財, 放左幾日假, 過着豬一般的生活, 由朝食到晚.... 應哂節啦!!!!

不過豬係唔識打麻雀ge, 我識...... 打足七七四十九圈之後今日要番工喇!!!! 好可憐啊!!!!

由年初一打到年初三, 頭兩日都嬴架, 點知尋日輸左成百幾蚊, 真係肉都痛埋. 平時打d cheap 牌都係諗住防止老人痴呆加麻, 廿蚊打足一日, 尋日同我阿姨表妹打, 唔同我打咁細, 結果我就衰左喇!!!! 百幾蚊夠打一年架喇!!!!!!

情人節

過了一個忙碌的情人節, 雞脾主人外地公幹回來接回雞脾, 害得666呆等了半小時有多, 真的唔好意思. 其實我地都唔係咁注重情人節ge人, 我相信真心對對方就日日都係情人節啦, 送花更加不需要了, 我只覺得求婚時有花就行, 其他日子可免則免吧. 可能係因為人大左對節日觀念越來越少, 只想平平淡淡同自己喜歡的人過就心滿意足, 追求不太花巧的生活, 細水長流就好了.

尋晚好興奮, 差d訓唔着呀!

咩咁興奮?! 其實係尋晚去醫院探訪完, 感覺好好, 好開心.

之前咪話好驚食檸檬, 不過尋日冇食過檸檬, d病人仲對我好好, 有好多個都傾左好耐. 尋晚去到沙田醫院等Mabel, 之前響聚會見過一次, 但感覺佢好爽, 一睇就志同道合好容易傾得埋ge人, 點知傾開佢都有咁ge感覺, 大家一見如故, 而且佢做左探訪好耐, 敎左好多探訪技巧俾我, 好多謝佢.

我探6AB房, 一邊男, 一邊女, 全陪都係老人家, 剛好又與着家人探病時間, 房入面都好繁忙. 第一個探ge竟然係基督徒, 好幸運啊, 我話俾佢聽我係第一次探, 佢仲係我第一個探ge病, 婆婆即刻話感謝天父, 我當然都同樣感謝啦, 我真係好好彩呀.

之後同幾個病人都好好傾, 之前有義工話男病房比較難探, 個個兇神惡殺, 但我又覺得唔係噃, 我仲同有個伯伯好好傾添, 真係大感意外.

不過我覺得其實做牧靈技巧唔係最重要, 最緊要係用個真心去探望同關懷病人, 佢地就會感覺得到同好願意同你溝通喇. 我過完新年會再去, 希望我尋晚探過ge病人都已經出哂院啦.

真冇鬼用!

我真冇鬼用, 尋晚老闆走竟然喊左出厘, 佢一講話八年, 唉! d眼淚就唔聽話流左出厘. 成日都control得好好, 臨尾衰左.... 共事八年的確唔短, 而且見佢走得咁黯然真係好難過. 希望佢有新發展啦.... all the best.

今朝新官正式入主, 哈!!! 我竟然又遲到, 一番到去就聽到conf room傳來兩把陌生ge聲音, 係老餅聲, 仲要營住係煙屎牙老餅.... 跟住俾人"的"左入房, 講吓新官上任ge工作, 都未入正題, 一講到我老闆走我竟然又頂唔順成隻眼都紅哂, 瘀爆! 我真係冇用, 成日都咁眼淺..... 冇得救呀!!!!!!